Fermingarfjör haldið í fjórða sinn í Skálholti.

 Í febrúar og mars í ár verður í fjórða sinn boðið upp á fermingarfjör í Skálholti. Í ár taka fjórir hópar fermingarbarnanna þátt í dagskránni, bæði frá Suðurlandi og af höfuðborgarsvæðinu. Fermingarfjörið hefur á undanförnum árum fest sig í sessi sem áhugaverð viðbót við hefðbundinn fermingarundirbúning og vakið mikla ánægju meðal þátttakenda.

Dagskrá fermingarfjörsins er fjölbreytt og miðar að því að fræða og virkja börnin á lifandi hátt. Hún hefst með sameiginlegri kynningu, að því loknu er hópnum skipt upp þar sem sum taka þátt í hópefli en önnur fara í ratleik um Skálholtsstað og kynnast sögu og umhverfi staðarins. Í hádeginu er boðið upp á pizzu á veitingastaðnum Hvönn.

Eftir hádegi fá fermingarbörnin kynningu á orgelinu í dómkirkjunni, þar sem Jón Bjarnason organisti leiðir þau inn í heim hljóðfærisins og tónlistarinnar. Dagskránni lýkur með kyrrðarstund í kirkjunni og að lokum er boðið upp á kaffihressingu áður en haldið er heim.

Í Fermingarblaði Morgunblaðsins í fyrra mátti lesa viðtöl við tvö fermingarbörn úr Kópavogskirkju þar sem þau lýstu fermingarfræðslunni sinni. Þar kom meðal annars fram að það sem stóð upp úr í undirbúningnum var dagsferðin í Skálholt og þátttaka í fermingarfjöri sem þau sóttu fyrr á árinu.

Umsjón með dagskránni hafa Pétur Ragnhildarson, prestur í Breiðholtsprestakalli, Kristján Björnsson vígslubiskup í Skálholti og Jón Bjarnason organisti. Dagskráin nýtur jafnframt styrks úr Héraðssjóði Suðurlandsprófastsdæmis.

Fermingarfjörið í Skálholti hefur þróast jafnt og þétt frá því fyrsti hópurinn kom árið 2022. Árið 2023 varð að gera hlé vegna framkvæmda í Skálholtskirkju, en síðan þá hefur dagskráin verið í fullum gangi þar sem nýir hópar fermingarbarna hafa notið fræðslu og skemmtunar í Skálholti.

• 

• 

• 

• 

• 

• 

• 

• 

• 

• 

• 

•