Helgihald

Messa er í Skálholtsdómkirkju alla sunnudaga kl. 11 nema á hátíðum eða þegar annað er auglýst. Annar algengur tími er kl. 14 á jóladag, páskadag, hvítasunnu, Skálholtshátíð og á kantötumessu á Sumartónleikum. Auk sóknarprestsins þjóna vígslubiskup, héraðsprestur og djákni við helgihaldið. Organisti er Jón Bjarnason. 

Kirkjan er opin alla daga kl. 9 til 18.​​​

Morgunbænir eru sungnar flesta virka morgna í Skálholtskirkju kl 9. Öllum er velkomið að taka þátt og setjast inn í Maríustúkuna, norðurkórinn. Tíðargjörðin er sígild og hefur verið föst í sessi í Skálholtskirkju um ártugi með núverandi sniði en samkvæmt ævafornri hefð. Prestur, organisti, djákni og biskup leiða sönginn.

Árið um kring eru haldnar athafnir í Skálholtskirkju og er kirkjan bæði útfararkirkja Uppsveita og vinsæl til kirkjulegra athafna, hjónavígslu og skírna. Fjöldi tónleika er í kirkjunni enda hljómburður góður, orgelið afar gott og núna síðast bætist við konsertflygill. Þá hefur hljóðkerfið verið endurnýjað.  

Skálholtshátíð er ár hvert á Þorláksmessu á sumar, 20. júlí, eða helgi næst henni. Hátíðin er á ábyrgð vígslubiskups, sr. Kristjáns Björnssonar, í samstarfi við marga aðila, með miklu helgihaldi, hátíðardagskrá, tónleikum, málþingum, útimessu og tíðargjörð, barnadagskrá og kirkjukaffi. Pílagrímagöngur eru til Skálholts og enda í messunni. Tónlistarstjóri hátíðarinnar er Jón Bjarnason, dómorganisti.