Að öllu leyti merkiskona! Fræðsluerindi 26. okt um Valgerði Jónsdóttur biskupsfrú í Skálholti

Fræðsluerindi um líf og störf Valgerðar Jónsdóttur biskupfrúar verður haldið í Skálholti laugardaginn 26. október kl 16:00. Fyrirlesturinn verður haldinn í fyrirlestrarsal Hótel Skálholts, gengið er inn um veitingastaðinn.

Halldóra Kristinsdóttir sérfræðingur á handritasafni Landsbókasafnsins heldur erindið og leiðir stutta göngu að því loknu. Farið verður um Skálholtsdómkirkju og niður á safnið þar sem legsteinn sá sem Valgerður lét útbúa fyrir Hannes Finnsson biskup og fyrri eiginkonu hans Þórunni. Gengið verður út undirgöngin og út á fornleifasvæðið sem sýnir húsaskipan á 17 og 18 öld þegar Valgerður var biskupsfrú í Skálholti. 

Þegar Valgerður Jónsdóttir (1771–1856) biskupsfrú var borin til grafar voru þau orð látin falla að hún hefði verið í „öllu tilliti merkiskona“. Óhætt er að taka undir það, enda var lífshlaup hennar ólíkt flestra annarra kvenna. Þegar Valgerður var 18 ára giftist hún Hannesi Finnssyni biskupi í Skálholti sem þá var fimmtugur. Hún varð ekkja aðeins 25 ára gömul og stóð ein fyrir búi í Skálholti í tíu ár. Þá giftist hún seinni eiginmanni sínum, Steingrími Jónssyni sem síðar varð biskup yfir Íslandi. Valgerður var yfirstéttarkona, af ríkum ættum, vel menntuð og gáfuð. Hún safnaði miklum auði, stóð í viðskiptum og var ein ríkasta kona Íslands á sínum tíma.  En hún var líka dóttir, eiginkona, móðir og amma. Í erindinu verður leitast við að draga upp mynd af merkiskonunni Valgerði Jónsdóttur, en fjölmargar heimildir hafa varðveist sem geta varpað ljósi á líf hennar og sögu.

Halldóra Kristinsdóttir starfar sem sérfræðingur á handritasafni Landsbókasafns Íslands – Háskólabókasafns. Árið 2021 tók hún þátt í að setja upp sýningu í safninu þar sem Valgerðar Jónsdóttur var minnst þegar 250 ár voru liðin frá fæðingu hennar.

Veitingastaðurinn Hvönn verður opinn og hægt að kaupa veitingar þar. Súpa dagsins og brauð er á 2990 kr.

Fyrirlesturinn er öllum opinn og ókeypis.