Útimessa við Þorlákssæti - Setning Skálholtshátíðar

Útimessan er við Þorlákssæti og liggur göngustígur, Þorláksleið, framhjá minnisvarða um herra Jón Arason. Slétt og þægileg gönguleið að mestu á malbikuðum stíg og tekur um 7 mín. Þorlákssæti er sagt hafa verið staðurinn sem Þorlákur helgi Þórhallsson gerði að sínum einka griðarstað. Sagt er að hann hafi gjarnan gengið þangað til að losna undan ys og þys staðarins og stjórnunar. Sú hefð hefur því skapast að Þorlákssæti er staður kyrrðar og íhugunar sem enginn má raska. Morgunbæn við Þorlákssæti er sérstaklega fögur við sólarupprás eða snemma á sumarmorgni. Að venju leiðir vígslubiskup morgunmessuna og annast útdeilingu með aðstoð viðstaddra sem einnig eru fengnir til að lesa úr Heilagri ritningu í kyrrð morgunsins.