Fjölskyldutónleikarnir "Hver vill hugga krílið?"

Sunnudaginn 3 apríl kl 14:00 verður boðið uppá fjölskyldutónleika í Skálholtskirkju.

Tónverkið "Hver vill hugga krílið?” er fyrir barnakór, hljómsveit og sögumann. Verkið er eftir Olivier Manoury og er samið við sögu Tove Jansson í þýðingu Þórarins Eldjárn.


Ævintýrið segir frá litlum dreng sem býr einn úti í skógi. Hann er mjög feiminn og þorir ekki að vingast við nokkurn fyrr en hann hittir litla stúlku sem er enn hræddari við lífið en hann. Þá finnur hann kjarkinn og sagan endar á því að þau ákveða að sigla burt á bát með fílifjonkunum. Óttinn víkur fyrir gleði og vináttu. Krílið og Stráið hugga hvort annað, nú hafa þau eignast vin!


Litríkum myndum Tove Jansson er varpað upp á meðan á flutningi verksins stendur. Verkið tekur um 40 mínútur í flutningi og er við hæfi barna á öllum aldri.


Kórarnir sem syngja eru Barnakór Hvolsskóla og Graduale Futuri. Sögumaður er Eyjólfur Eyjólfsson og hljómsveitina skipa Olivier Manoury bandoneon, Edda Erlendsdóttir píanó, Eggert Pálsson slagverk og Richard Korn kontrabassi. Stjórnandi er Guðmundur Óli Gunnarsson.


Verkið var fyrst flutt í Langholtskirkju árið 2019 og í framhaldinu kviknaði sú hugmynd að stækka verkefnið og flytja það víðar og með fleiri barnakórum. Það varð úr og verkið var næst flutt á Ísafirði með Barnakór Tónlistarskóla Ísafjarðar, Stúlknakór Tónlistarkóla Ísafjarðar og Graduale Futuri. Þaðan átti leiðin að liggja til Akureyrar, í Skálholt og loks í Hörpu. Af því varð ekki, ekki fyrr en nú tveimur árum síðar. Verkið var flutt í Hofi sl. sunnudag með norðlenskum barnakórum og Sumardaginn fyrsta verða svo lokatónleikar í Hörpu í samstarfi við tónlistarhátíðina Big Bang. Þar koma norðlensku og sunnlensku kórarnir allir fram. Verkefnið er styrkt af Barnamenningarsjóði, Uppbyggingasjóði SASS, Uppbyggingasjóði SSNE, Söngmálastjóra þjóðkirkjunnar og Verðandi listsjóði og unnið í samvinnu við Sinfóníuhljómsveit Suðurlands.


Miðaverð er 500 fyrir 12 ára og yngri og 1500 fyrir eldri en 12 ára.

Sérvaldar færslur
Nýjustu færslur
Safnið
Stikkorð
Samfélagsmiðlar
  • Facebook Basic Square
  • Twitter Basic Square
  • Google+ Basic Square