Dr. Ásgeir Jónsson flytur ávarp í dagskrá um herra Jón Arason


Menningardagskrá verður helguð herra Jóni Arasyni í Skálholti og mun dr. Ásgeir Jónsson, seðlabankastjóri, flytja ávarp. Ásgeir sendi nýverið frá sér merka bók "Uppreisn Jóns Arasonar" og hefur varpað nýju ljósi á samhengið í þessari átakasögu Íslands. Skálholtskórinn syngur og organisti er Jón Bjarnason. Sr. Kristján Björnsson leiðir stundina og les úr ljóðmælum herra Jóns Arasonar, sem lét lífið fyrir trú sína og ættjörð í Skálholti 7. nóvember 1550. Eftir dagskrá í kirkjunni verður gengið eftir nýrri Þorláksleið að minnisvarðanum um Jón Arason með blys til að leggja kertaljós að fótstallinum. Eftir stundina verður boðið uppá heitt súkkulaði á veitingastaðnum Hvönn í Skálholtsskóla sem er reyndar opinn með veitingar allan daginn.


Fyrr um daginn er messa í Skálholtsdómkirkju kl. 11 og er það Allra heilagra messa. Þar verður þeirra minnst sem látist hafa frá síðustu Allra heilagra messu og er velkomið að koma með nöfn sem lesin verða við altarið í bæninni. Einnig má senda nöfn látinna ástvina í pósti á biskup@skalholt.is til að lesa í kirkjunni hvort sem þau hvíla nær eða fjær.

Fólk er beðið að klæðast eftir veðri.

Fyrri myndin er af minnisvarðanum og sér yfir á tenginguna við nýju Þorláksleiðina sem lögð hefur verið frá Skálholtsdómkirkju að þessum stað sem helgaður er minningu þeirra feðga, Jóns, Ara og Björns. Síðari myndin er yfir leiði herra Jóns Arasonar á Hólum.


Messan hefst kl. 11 sunnudaginn 7. nóvember og dagskráin hefst kl. 16 í kirkjunni sama dag. Til fróðleiks má geta þess að Kaþólska kirkjan á Íslandi messar í Skálholtsdómkirkju laugardaginn 6. nóvember kl. 11.30 að þessu sama tilefni og fer einnig með ljós að minnisvarðanum, ljós við ljós.

Sérvaldar færslur