Jón Þorkelsson Vídalín - messur, minnisvarði og nýr kross 30. ágúst

26.08.2020

Sunnudaginn 30. ágúst eru liðin 300 ár frá því að herra Jón Þorkelsson Vídalín, Skálholtsbiskup, andaðist á ferð sinni í Biskupsbrekku 1720. Meistara Jóns verður minnst í helgihaldi kirkjunnar þennan dag og sérstaklega í Skálholtsumdæmi.

 

Víða eru fermingar um land allt en boðskapur og ræðusnilld meistara Jóns er slík að hún á brýnt erindi við unga fólkið engu síður en fullorðið fólk og áhugafólk um sögu og menningu. Af nógu er að taka hjá Jóni Vídalín.

 

Af þessu tilefni verður vígður nýr kross og afhjúpað minnismerki í Biskupsbrekku sem Páll Guðmundsson á Húsafelli hefur unnið að tilstuðlan Skálholtsfélagsins hins nýja.

Það er gaman að segja frá því að krossinn var settur saman á Kolsstöðum á Hvítaársíðu og minnisvarðinn er höggvinn úr steini sem Páll fann á Kaldadal og hjó þar. Allt kemur þetta úr umdæmi Skálholts.

 

Jón Vídalín er einn merkasti biskup seinni alda í Skálholti og kunnur af lærdómi sínum. Eitt þekktasta ritverkið hans er án efa Vídalínspostilla sem kom tvisvar út á síðustu öld, síðast 1995. Fyrsta útgáfa kom út í tveimur pörtum 1718 og 1720.

 

Núna hefur verið gefið út nýtt og vandað ritverk um herra Jón Vídalín eftir Torfa K. Stefánsson og ritar forseti Íslands, Guðni Th. Jóhannesson formálsorð að verkinu. Er það ævisaga hans og æviverk, aldalýsing og valin ritverk sem eru ýmist vandfengin eða hafa ekki komið út á prenti fyrr. Verkið er gefið út af Kirkjuráði og Skálholtsútgáfunni og er þegar fáanlegt í Kirkjuhúsinu. Formlegur útgáfudagur er föstudagur 28. ágúst og verður stutt afhöfn í Vídalínskirkju í Garðabæ kl. 15 af því tilefni. Verður streymt frá henni í ljósi Covic19 aðstæðna. Athöfnin í Biskupsbrekku er öllum opin og er fólk beðnið að gæta að tilmælum almannavarna í hvívetna.

 

Sunnudaginn 30. ágúst er dagskrá í nokkrum liðum og á nokkrum stöðum.

 

 

 

Messur sem verða sérstaklega helgaðar herra Jóni verða í Skálholtsdómkirkju kl. 11 þar sem Jón Vídalín er grafinn og á sama tíma kl. 11 verður tónlistarmessa í Garðakirkju á Álftanesi en þar er Jón Vídalín fæddur.

 

 

 

Í Þingvallakirkju verður helgistund kl. 15.30, bæði inni og fyrir utan. Þar verður kirkjuklukkunni hringt sem Jón Vídalín gaf þegar hann var vígður biskup í Skálholti 1698 og þar verður m.a. lesið úr lagaræðunni sem Jón á að hafa flutt þar við upphaf prestastefnu á Þingvöllum 1718.

 

Vígsluathöfnin og helgistundin í Biskupsbrekku hefst kl. 17.00. Til að ljúka 300. ártíð meistara Jóns Vídalín er hægt að fylgja þaðan þeirri leið sem farið var með Jón til greftrunar í Skálholt og verður stutt bæn þar við legsteininn hans í kjallara kirkjunnar um kl. 19.00.

 

 

Í Skálholti verður í boði að panta sér kvöldverð í Skálholtsskóla en nauðsynlegt er að hringja áður (s. 486 8870) vegna allra varúðarráðstafana og takmarkana sem gilda um hótel og veitingastaði.

 

Streymi verður frá helstu viðburðum  sem eru innandyra.

Biskupsbrekka er á Uxahryggjarleið og um 20 km upp frá Skógarhólum. Farið er um malbikaðan veg langleiðina upp að Kaldadalsleið en beygt þar inná gamla veginn við vegtenginguna að norðan.

 

Fyrir hönd Vídalínsnefndar,

Frú Agnes M. Sigurðardóttir, biskup Íslands

og sr. Kristján Björnsson, vígslubiskup í Skálholti

Share on Facebook
Share on Twitter
Please reload

Sérvaldar færslur

Öruggar útfærslur á öllum þáttum kyrrðardaga út frá kröfum um sóttvarnir

September 23, 2020

1/10
Please reload

Nýjustu færslur
Please reload

Safnið
Please reload

Stikkorð
Please reload

Samfélagsmiðlar